الوطنية فضيلة الفاسدين

عايزتعرف الحرامى من أول ما تشوفة... تلاقية أول واحد بيكلمك عن الشرف وعايز تعرف المرتشى .... تلاقية برضة أول واحد يكلمك عن طهارة اليد و العفة و الرضا بالقليل وعايز تعرف الفاسد..... تلاقية أول واحد يكلمك عن الوطن وقد إية حب الوطن مسهرة الليالى و منغص علية عيشتة وإن الوطن دة هو كل حياتة ويكلمك عن خير البلد المنهوب و الناس اللى معندهاش ضميراللى عمالة تغرف و تكوش على كل حاجة و يقولك برضة قد إية هو خايف علي البلد وإنة عايز يرشح نفسة فى الإنتخابات و حيعمل المستحيل علشان يكسبها إن شاالله بالتزوير علشان يبقى من أصحاب القرار و يقدر يصلح حال البلد المايل .
(ما لهؤلاء القوم لا يكادون يفقهون حديثا ) هى الناس دى فكرانا عبط ولا إية ولا إحنا شكلنا باين علية الهطل و الأسطوانة المشروخة دى زهقنا منها خلاص و الواحد نفسة بتموع و بيبقى عايز يرجع أما بيسمع الكلام المضروب دة و الغريب فى الموضوع و الحاجة اللى أنا مش فاهمها إن الناس دى هى اللى بتنجح فى الإنتخابات و فعلا هم اللى بيوصلوا لمواقع إتخاذ القرار و الدليل ...بص حواليك و إنت تعرف . و البلد بفضل هؤلاء العباقرة رايحة فى داهية آسف قصدى راحت خلاص فى داهية .