والعة ياريس

واللة أنا ما بحسد و لاحاجة ياريس وأنا أقدر برضة و علشان أثبت لك إنى ما بحسدش و لا حاجة حدعيلك من قلبى خد عندك : ربنا يطول فى عمرك و تقعد على قلبنا لغاية ما تخلل و تجيب ضرفها و تخربها و تقعد على تلها قادر يا كريم ربنا يزيدك من نعايمة و تكوش على كل حاجة فى البلد لوحدك وتشحتنا و من لاقيش ناكل إلهى لو عملوا إنتخابات تطلع الأول و محدش غيرك ياخد أصوات.. بالتزوير طبعا ربنا يخليلك عيالك و الواد چيمى تورثة حكم البلد بعد عمرطويل دة حتى يشرفنا وسط الناس و نقول دة هيحكمنا ريس إبن ريس دة حيكون و لا الريس حنتيرة فى زمانة و الواد لول ربنا يعلى مراتبة و ياخد التوكيلات اللى فى البلد كلها حنى توكيل إبر بوابير الجاز. والست حرمكم ينولها اللى فى بالها و تاخد جايزة نوفل فى رعاية الأطفال عشان ربت لنا جوز عصافير ياخواتى عليهم. ربنا يبعد عنك النكد و منظمة حقوق الإنسان و منظمات الحريات المدنية و الأمم المتحدة والإخوان المسلمين الحاجات اللى تعكر الدم دى ربنا يبعد عنك الديقراطية و الحريات و الكلام الفارغ دة إلهى ما تسمع للمعارضة أى صوت ينغص عليك عيشتك و تكبس على نفسهم لغاية ما يتهدوا و يقولوا حقى برقبتى إلهى الشعب كلة يخلع برة البلد يا تجيهم الفرة تاخدهم كلهم عشان البلد تفضى عليك لوحدك و تحكم براحتك يامعلم إلهى ما تورد على جهنم أبدا دة فى المشمش طبعا بس يا عالم الخير فين ................. شوفت بقة ياريس أنا دعيتلك إزاى وشوفت بقة معزتك عندى قد إية المهم إنت عايز تعرف أنا قولتيلك لية والعة ياريس الإجابة هتعرفها المرة اللى جاية و سلام بقة يا ريس عشان عندى سبوبة
قـــــائــد