البعض يفضلونها فاسدة

لا أدرى ما الذى دعانى إلى أن أقتبس هذا العنوان فهو للعارفين على وزن فيلم مارلين مونرو وچاك ليمون الشهير البعض يفضلونها ساخنة مع أن هذا الفيلم على ما أتذكر آخر مرة شوفتة كان فى يوم 12أكتوبر 1992 يوم الزلزال ولسوء الحظ كان الفيلم شغال و الواحد كان مندمج مع الست مارلين وفى منتصف الفيلم بالضبط حسيت إن التلفيزيون بيرقص وسمعت صويت فى الشارع و الحاجة قالت لى قوم إجرى بسرعة ياولة على الشارع فى زلزال ونزلت الشارع لقيت أمة لا إلة إلا اللة و كأن القيامة قامت ربنا يستر وخلص الموضوع دة على خير المهم شكلنا واللة العظيم إتعودنا على الحاجات المضروبة و الفسدانة يعنى الواحد مننا يروح برجلية عند مجدى هوهو بتاع الكفتة و ياكل ويضرب سندوتشات لما يتعمى وهو عارف إن اللحمة دى مضروبة و إن ما كانت لحمة كلاب تبقى لحمة مستوردة منتهية الصلاحية من يجى قرن واللى الكيلو منها بنص جنية و يطلع من عندة آخر مزاج ويوم ما الواحد ينضف و ياكل فى حتة كويسة معدتة على طول توجعة و ما يتمش الليل إلا و الواحد عند الدكتور و قس على ذلك مثلا رجل الأعمال من دول يروح الصين و يلفها كعب داير علشان يجيب البضاعة الكسر والمصنوعة تحت بير السلم و يشمشم عليها زى الكلب هول ويا سلام أول ما يبدر البضاعة المضروبة فى السوق تلاقى الناس عليها أمم ولا إخوانا الصيادلة الحلوين اللى ما بيشتغلوش غير فى الأدوية المنتهية الصلاحية أول اللى فاضلها أسبوعين ولا حاجة و هو كلة ڤيتامين و لا الدكتور من دول يستعمل أدوات جراحية من أيام أبو قراط ومن دة لدة من غير تعقيم ولا يحزنون لغاية ما بقى الإلتهاب الكبدى الو بائى منتشر فى مصر زى البرد بالضبط وإخونا المهندسين اللى بيشتغلوا فى الحديد و الأسمنت المغشوشين و مشى حالك ياعم هو حد فاهم حاجة والواحد مش عارف يجيب سيرة مين ولا مين و الموضوع تطور أكتر من كدة وفى بعض الناس عاجيبها الوضع الحالى ومش عايزة تتغير و شعارها إن المضروب اللى تعرفة أحسن من الحلو اللى ماتعرفوش والحدق يفهم و الكلام دة فى السياسة و الرياضة و الإقتصاد و التعليم لدرجة إن الموضوع دة أصبح سمة مميزة للعصر المهبب اللى إحنا فية و أنا عايز أغير العنوان و أخلية الكل يفضلونها فاسدة و الحمد للة الموضوع عدى على خير من غير ما يقوم زلزال